PFL

2012 йилги Ўзбекистон Кубогининг дастлабки чорак финалчилари аниқланди.

4 июль, чоршанба куни Ўзбекистон Кубоги нимчорак финалидан ўрин олган дастлабки жавоб ўйинлари бўлиб ўтди. «Олмалиқ» ўз майдонида «Андижон»ни қабул қилган бўлса, Тошкентдаги «Жар» стадионида Наманганнинг «Навбаҳор» жамоаси «Пахтакор» меҳмони бўлди.

Олмалиқдаги ўйин 2:1 ҳисобида мезбонлар ғалабаси билан якунига етганига қарамай, Ўзбекистон Кубоги чорак финал йўлланмаси андижонликларга насиб этди. Чунки Андижонда бўлиб ўтган дастлабки ўйинда майдон эгалари 3:1 ҳисобида ғалаба қозонишган эди. Жавоб ўйинида ҳисобни биринчи бўлиб майдон эгалари очганига қарамай (Александр Востриков, 33-дақиқа), учрашувнинг 64-дақиқасида Баҳром Абдураҳимов ҳисобни тенглаштиришга муваффақ бўлди. Учрашув якунланишига 8 дақиқа қолганида «Олмалиқ» футболчиси Зафар Тўраев томонидан урилган бесамар ғалабага асос бўлди.

Тошкентда «Пахтакор» ҳамда «Навбаҳор» ўртасида бўлиб ўтган баҳс 1:1 ҳисобидаги дуранг натижа билан якунига етди. Учрашувнинг 16-дақиқасида тошкентликларнинг грузиялик ярим ҳимоячиси Кахи Махарадзе ҳисобни очган бўлса, иккинчи бўлимнинг 18-дақиқасида Собир Ҳамидов ўртадаги мувозанатни тиклади. Учрашув охиригача бошқа гол киритилмади. Дуранг натижа эса «Пахтакор»ни чорак финал йўлланмаси эгасига айлантирди. Чунки «Навбаҳор» майдонида бўлиб ўтган дастлабки ўйинда «Пахтакор» 2:1 ҳисобида ғалаба қозонган эди.

Ўзбекистон Кубоги чорак финалида «Андижон» энди «Пахтакор»га қарши баҳс олиб боради. Икки жамоа ўртасидаги дастлабки ўйин 9 июль куни Андижонда бўлиб ўтса, жавоб ўйини 29 июль куни ўтказилиши режалаштирилган.

Ўзбекистон Кубоги нимчорак финал жавоб ўйинлари доирасидан ўрин олган қолган баҳслар 5 июль, пайшанба куни ўтказилади. «Локомотив» ҳамда «Нефтчи» жамоалари ўртасидаги нимчорак финал ўйинларининг дастлабкиси эса 5 июль куни бўлиб ўтса, жавоб ўйини 9 июль куни бўлиб ўтади.