PFL

2012/2013 йилги мавсум учун мўлжалланган футбол ўйини Қоидаларига киритилган ўзгаришлар сабаб, ўйин вазиятларининг нотўғри шарҳланишини олдини олиш мақсадида, «Насаф» футбол клуби ўйин Қоидалари бўйича бир кунлик семинар ўтказишни сўраб ЎФФ Ҳакамлар ва назоратчилар бошқармасига мурожаат қилди.

Ушбу семинарни ўтказишдан кўзланган мақсад – ўйин қоидаларини ўрганиш ва асосларини такрорлаш, шунингдек, Ўзбекистон Чемпионати ҳамда халқаро ўйинларда тез-тез учрайдиган ўйин ҳолатлари бўйича долзарб масалаларни муҳокама қилишдир.

Ушбу таълим машғулотлари клуб футболчилари ва мураббийларида ўйин қоидалари тўғрисида бир хил билимларнинг ҳосил бўлишига хизмат қилади, ўйиннинг томошабоплигини ошириб, ўйинчиларнинг ички ва халқаро мусобақаларда ҳакамлар томонидан жазоланишлари сонини камайтиради.

ФИФА ва ОФКнинг энг сўнгги ўқув қўлланмаларидан фойдаланиладиган семинарда қуйидаги мавзулар муҳокама қилинади:

- Рақибга оёқ билан зарба бериш;
- Рақибга қўл билан зарба бериш;
- Вақтни чўзиш;
- Симуляция;
- Норозилик билдириш;
- Тўпни қўл билан ўйнаш;
- «Ўйиндан ташқари ҳолат»;
- Ўйинни қайта бошлашда вақтни чўзиш;
- Стандарт вазиятларда талаб қилинган масофани сақлаш;
- Рақибни гол уриш учун яққол имкониятдан маҳрум қилиш;
- Футболчилар экипировкаси;
- Расмий шахсларнинг техник ҳудуддаги ҳулқи.

Семинарни ОФК инструктори Фарҳод Абдуллаев ўтказади.